For tredje år på rad fekk elevane på vg3/vg4 påbygg på Fitjar vgs. besøka Stortinget i Oslo og læra meir om demokratiet i Noreg.
Elevane på vg3 og vg4 påbygg på Fitjar vgs. hadde i byrjinga av mars 2025 ein innhaldsrik studietur til Oslo for å læra meir om demokratiet i Noreg. På den første dagen besøkte dei 22. juli-senteret, der dei fekk læra om demokratiske verdiar, høyreekstremisme og om korleis ein kan avsløra konspirasjonsteoriar. Me var og på ei historisk vandring i sentrum, der me enda opp på Henrik Wergelands grav på Vår Frelsers gravlund. Gravmonumentet hans vart reist i 1849 av svenske og danske jødar som takk for Wergelands lange kamp for å endra grunnloven slik at jødar skulle få lov til å bu i Noreg. Den såkalla "jødeparagrafen" vart fjerna frå grunnloven i 1851.
Den andre dagen byrja med eit besøk på Akershus festning, der fokuset var på andre verdskrig og på bruken av dødsstraff under og etter krigen. Mellom anna arbeidde elevane med ulike kjelder om avrettinga av Vidkun Quisling på den staden der han vart avretta. Etterpå var det klart dagens høgdepunkt: Eit besøk på Stortinget, der elevane først fekk ei omvising i bygget og deretter gjennomførte rollespelet «Demo». I dette spelet vart elevane delt inn i ulike politiske parti og måtte arbeida som Stortingsrepresentantar for ein dag. Alle elevane var på talarstolen og debatterte om lovframlegg, og dei måtte handtera både voteringar, komitéarbeid, mistillitsforslag og kabinettsspørsmål. Dette var same dagen som Stortinget debatterte auka støtte til Ukraina, så det var det var ein spennande dag å vera til stades i bygget. Me fekk og helsa på Stortingspresident Masud Gharahkhani.
